U natjecanju literarnog, dramskog i novinarskog stvaralaštva LiDraNo, a pod budnim okom mentorice Jelene Franjković, Fran Dražić je sa svojim novinarskim radom (intervju) pod naslovom „Stari kruh i novi postoli“ pozvan na državnu smotru koja je i ove godine održana u Vodicama. Rame uz rame s najboljima od najboljih iz cijele Republike Hrvatske, Fran je predstavio svoj tekst i na taj način promovirao ne samo svoju školu, nego i svoj Bribir, bribirsku čakavštinu i cijelu Vinodolsku općinu.
Čestitamo Franu na postignućima i želimo mu da još puno piše i stvara, a posebno mu hvala što njeguje narječje, a samim time čuva i veliki dio kulturne baštine.
*Franov intervju s kojim je stigao do državne smotre možete pročitati u nastavku.*
Išćuć zanimljive i poučne životne priči nis moral poć dugo. Dosta j bilo zavirit va povist moje familije i pronać ljude šći j život bil primjer nigdanjeg teškog življenja.
Stari kruh i novi postoli
Slave Šepavi moj je praded. Volin s njin divanit o njegovon životu i detinstvu. Danas ima 96 let, četvero praunučadi i puno j toga doživel. Puno lipog, ali i puno manje lipog.
Poli njega san sel jedno zapolne v kuhinji i pripovidal mi j o svon životu. Del toga san zapisal va ovon intervjuu jer njegova priča j jedna od onih ke se tribaju čut.
Sil ti, dede, volel hodit va školu?
Nisan ju volel i nisan bil baš dobar đak, ali san ju se tako finil jer san moral.
Morebit mi sej zamirilo ča san hodil pišice saki dan, a bilo mi j teško zač san šepal.
Zač si šepal?
Ko mali san obolel, a tada se nij hodilo za se dohtoru. Ni ih ni bilo kot sad tako da san ja ostal šepav za celi život.
Kako j bilo živit va dobu bez televizije i mobitela? Ča ste uopće delali?
Mi smo se bome ko dica i nadelali. Ja san imel četiri brata i sestru. Bil san najmlaji pa me nisu baš oteli zimat sobun kad bi nikamo šli. Tako bin najčešće ostal doma s ocen i stricen. Moral san delat oko kuće i va vinogradi. Imeli smo blago: kravu, magare, ovce i kokoše pa j i oko njih bilo dela. Od toga se j i živelo. Nismo imeli puno soldih, al nismo bili ni lačni.
Čega si se igral?
Biloj puno dice va selu i uvik je bilo veselo. Igrali smo nogomet krpenun loptun ili skrivača. Delali smo i fikalci od javorike. Bilo nan je lipo, se dok nij prišal rat. Onda se j se prominilo.
Čaj bilo tada? Kako se j živelo va vrime rata?
Puno ljudih sela šloj va partizani, moji braća isto. I ja san otel šnjimi, ali me nisu zeli jer san bil dite i šepav.
Veselja j bilo se manje, a život se teži. Pazili smo na saki komadić kruha, jer nij bilo ča za jist.
Kad ti j bilo najteže?
Jedan dan va Bribir su prišli Talijani. Hodili su redon od kuće do kuće i pobirali ljudi. Zeli su i mene. Kamionon su nas odpeljali prvo v Riku, a onda v logor Visco va Italiji. Smestili su nas va drvene baraki. Bilo nas je puno, a mesta malo. Bilo mi j jako teško. Priko dana smo morali delat, a večer nas je zapiralo va baraki.
Nisu nan davali puno za jist. Dobil bin landicu kruha i lončić juhi. Bil san lačan i faleli su mi mat i otac, braća, sestra i moje selo, Jargovo.
Kako si se vrnul, sil pobigal?
Talijani su se povukli z rata i narod, ki je bil va logorih, bil je slobodan. Mogli smo se vrnut doma. Ljudi z okolnih mest su nan prnesli jilo i dali nan robu za oblić. Meni j jedna žena klala postoli od svoga sina va mali kuferić i to mi j dala. Tako san krenul doma.
Pa kako si z Italije prišal do Bribira? Toj dosta dug put.
Hodili smo pišice ili bi nas del puta prepeljali ljudi na kolih. Davali su nan za jist i pit puten, a put do doma bil je dug. Znan da mi j niki va ruki klal par štruc kruha. Tuliko sam bil lačan sih ovih let da san brže bolje znel postoli i klal kruh na njihovo mesto va kuferić. Nakon šetemani, dvi, napokon san prišal do mog Bribira i mog Jargova.
Ča su rekli tvoji doma kad su te videli?
Bilo j i suz i smiha, si su me zagrleli. Šal san za materun va kuću i klal kufer, ki san dobil, na stol. Sav sretan san rekal: ”Mamo, nećemo bit lačni, kruha nosin!” Oprl san kuferić i videl daj kruh ulovila plisan. Nisan mogal verovat kako san bedast, hitil san novi postoli, a prnesal plisnjiv kruh.
Mat i otac su me zagrleli i rekli: ”Bit oće kruha i postolih, neka si ti nan doma prišal.”
Puno je toga moj praded prošal va životi. Od početka ga ni život mazil i njegov život bil je puno drukčiji od moga danaska. Ono ča znan o njemu da j od toga dana uvik svojoj familiji mogal klast kruha na stol.
